Acts 17

Bulus La Lo Azhingye

1Avun ɓa duya n Amfipoli ɓedo Apoloniya yi ɓa lo Tasalunaika. A Yahudiyi aduwa nyakun ɓei gni ɓo. 2Bulus wa lo aduwa nyakun wa zhin waʼazi wo ɓo da Shekwoyi ɓeda, har Asati ngun ata n vi do lo. 3Woi ga bayani anabci n na ɓei zhin tu Yesu wahala ɓo, ɓedo nwo kala layi n vingwo, wa wu shi Yesu nu zhin Kristi. 4A Yahudiyi ho ɓa ku gaiciya ga ge, Yesu nu zhin Kristi. A Helleniyi n mwabegye anugbayi na nyikwoza yi ɓa ku yabui ɓa ze a Yesu viyi. N mwa begye nɓa mi ɓa ɓo zhin aza dnagmayi nu n Tasalunaika.

5Amma a Yahudiyi, n ɓa to ɓei ye ɓa ga Kristi gaiciya nyi m, ɓa zhin aza ɓa la wahala kala. Ɓa lo Jason puwa ɓo kun a Bulus n Sila yi ɓei cei ɓa lo n ɓai n azhi tukwoda aba, a ga ɓa tata.

6Amma to ɓa gye ɓa fi ɓom, ɓa wan Jason ɓa gni wo ɓe cei ɓedo nna Yesu viyi ho yi, ɓa ce akata fi ɓa nna iko da abye ɓa gna ɓa nu la wahala ka dna n zhi, n gye Bulus n Sila yi. 7Ɓa ce akata fi Json ge, wo ku a Bulus so fi n wo puwa. Har ma ge Bulus n Sila yi, ɓedo n Jason yi, ɓa da lo ge Yesu nu zhin esu do, gbo n Kaisar yi.

8Shi a iko da ɓo wo a ɓe deye tu Bulus tukwao, ɓedo n Sila yi, har n Jason yi ɓa ku je-je. 9A iko da ɓa Jason ya ɓedo na Yesu viyi, ai la ɓa gwo bwashi.

10N sukwoyi a Yesu viyi, ɓa gna a Bulus n Sila yi ge, ɓa lo Beriya. She ɓa ɓo si bwai ɓa lo a Yahudiyi aduwa nyakun. 11Aza n Beriya ɓei n yeyei du a Tasalunaikayi. Ɓa gwo Shekwoyi ɓeda na gmadai, ɓai ba fyegyi-fyegyi dna n Shekwoyi ɓeda, ntu ge ɓa kpe ge nya n Bulus da nyi kwo zhin gaiciya nu. 12Ntu deye ɓo, aza n mwa begye a Helleniyi anugbayi na nyikwozayi, ɓa ku gaiciya ga, ɓa ku ze a Yesu viyi.

13Amma shi a Yahudiyi atukwoda ɓo wo ge, a Bulus ku waʼazi Shekwoyi ɓeda nya da, ɓa gyi minagyi, ɓa la wahala ka dna n zhi. 14A Yesu viyi ɓa gna Bulus ge wo lo ela gbe, amma Sila n Timatawus yi, ɓa ku ce fi n Beriya. 15Aza nɓa ɓei da Bulus apye nyi, ɓa gni lo n woi har Atina. Bulus wa tnu ga Sila n Timatawus yi ge ɓa ɓe wolo-wolo. Aberiya yi n ɓa ɓei gni lo n Bulus yi nyi, ɓa nu ɓo jeze lo a Timatawus n tnu-tnu yi.

16Kafin Sila n Timatawus yi ɓa lo, Bulus ɓo ku ashan gyewye n Atina; wa ku kpe ge ɓa ta kpe Shekwoyi Gaiciya nya ye lo m. 17Walo aduwa nyakun, ntu ge wa zhin shaula n a Yahudiyi, ɓedo abyedo yi n ɓa ku gaiciya ga nyi, wo ɓei zhin waʼazi cici n gnikwo.

Bulus Nna Beyekpeyi

18Wa gye aɓeyekpeyi ho, shi wo ɓo gna ɓa Yesu efi ɓo, nwo kala la yi, ɓa ma wo san, ɓa kpe wo agye, ɓa ci wo wyegba ɓa gna ge, “Wo nuna nu kwo ge wa ɓe n kunnu woi-woi nu.”

19Ɓa la Bulus ɓa lo woi, aba a yi ge Arasa, ɓa gna, “Ɓe ha gnayi ho kunu woi-woi ɓo.” 20Ho da anya ɓo lo n yi ta kpe ɓa yelo m, yi ye ya kpe ɓa ye. 21Atina yi ɓedo azhiɓeyi zhin ɓa ye ntuge ɓa wo aɓo woi-woi.

22Bulus wa laka tu abaho ngye epe, wa da ɓo n ɓai wa gna, “Ofye Atinayi mi ku gye fye zhin a knunu bwashiyi nu.

23“Ntu ge ma zan, mi gye fye bagadi mi gni, n rubutu yi kakpe ge ‘Shekwoyi n ata kpe woye m. Emihin mi da wo nu ɓeda,’ n fye ga wo mwa-mwa dna n wyegma nyi.

24“Owo nu na zhin anyi, anya yi vinya a ɓa fi n ɓa nyi, wo ta dna aduwa nyakun nami na bwai m, ntu ge eshe n ʼkniyi wo nu zhin ɓa Dagayi. 25Oza ta mi wa biya n wo bukata yi m, ntu ge wo to anya kmayim. Wonu ga nyaho-nyahoi wye-wyei n sun yi, woi ga zaho-zahoi wo bukata. 26Wo na zhin aza vinya tunyi n Adamu sa, wa gna abye ya zhin anyi tunyi kmisunyi, wo nu kpe abye ye n ɓa ɓa kuka n begyi, esa yi nɓa ɓa duya. Wonu na zhi ɓa n ɓa zhiba.

27“Owo ɓemwi nu ɓei nyi ntu ge, abye ye vinya ɓa zanwo shin, wo ye ntuge ya ze owo nya, wo lo vivi n yi. 28Nwo mi nu yi bwa wye-wyei yi zan. Ngye shi fye zhin fya da dna fye anyi ɓesisi ge ‘Yi zhin Shekwoyi aɓi nu.’ 29Ndei deye gaiciya nu, kwo to bmiya ya gye Shekwoyi ngye ashan nu, n ʼza zhin n zinariyi ko azurfa ko kuta m. 30Esa n kwa duya nyi aza ɓei gba a shan, Shekwoyi wa zhin hankuri nɓai. Amma nsaiye Shekwoyi ye aza vinya ɓa fa ashan gba, ɓa ga wo nu mwa-mwa. 31Ntu ge wo nyipyei shi lo, n wo ɓei da anyi wa cei dna ɓefyece n oza aba n wo ɓei la wo ka n vingwo nyi, wo nu ɓo da aza wa.”

32Shi Bulus ɓo da afifiyi kala ku ɓo, aza ho ɓa ma san. Amma azaho ɓa gna yi ye cei pma lo ya wo n sado. 33Bulus ɓeda kmaknayi nu n ɓai wa lo wo nya. 34Azaho ɓa ku gaiciya ga. Diyonisisi shaula zhinyi n Atina ɓedo n nyikwoza hoi ai yi wo ge Damaris ɓa ku ye abui, n na azajei.